يعني إيه موت؟
يعني ضلمة وعتمة وسكوت
يعني تبطل تحلم
يعني تبطل تجيب القوت
وأنا مش ناوي أموت
يعني إيه موت؟
يعني تبطل تشم هوا
وتبطل تتمشى في الجناين والخلا
يعني تبطل تاكل لب في السهرة
ولا تشربشِ شاي في اللمة
لكن أنا مش ناوي أموت
يعني إيه موت؟
يعني تبطل تلعب مع ابن أخوك الصغير
يعني تنسي عمر الفراشة القصيّر
يعني تبطل تضحك ضحكة خبيثة في وسط محاضرة
يعني تنسى متعة زوغان في المترو مِ الأجرة
وعشان كده أنا مش ناوي أموت
يعني إيه موت؟
يعني ما تحسش بالفرحة لما تمطر
ولا تخرج في الشارع تتمخطر
يعني ما تحسش بكُباية كاكاو دافية في البرد
ولا نشوة مية في الحر
ما أصل أنا مش ناوي أموت
أنا مش ناوي أموت
وعايز أبقى
عايز أموت شجرة
لكن واقفة
شجرة لما تموت بتتحلِل
وتنزل في ثنايا الأرض وتتغلغل
تتحلِل وتتحول
لسماد يشق شجرة من الأول
وتطلع شجرة ثمرها كبير
تقطف منه العصافير وتطير
تطير لبلاد تانية
وتعيش حياة فانية
وتموت
وتتحلِل
وتتحول
لسماد يشق شجرة مِ الأول
ما أنا أصلي مش ناوي أموت
Aucun commentaire:
Enregistrer un commentaire